ஈரானின் தூதரகங்கள் மீது எந்தவொரு தாக்குதலும் நடத்தப்பட்டால், விரைவான மற்றும் வலுவான பதிலடி கொடுக்கப்படும் என்றும், அப்பகுதியில் உள்ள இஸ்ரேலுடன் தொடர்புடைய அனைத்து தூதரகங்களும் முறையான இலக்குகளாக அறிவிக்கப்படும் என்றும் ஈரான் இராணுவ செய்தித் தொடர்பாளர் கடுமையான எச்சரிக்கை விடுத்துள்ளார்.

ஈரானின் கதம் அல்-அன்பியா மத்திய தலைமையகத்தின் செய்தித் தொடர்பாளர் இந்த எச்சரிக்கையை விடுத்தார். மேலும் அத்தகைய நடவடிக்கைகள் ஒரு தீர்க்கமான பதிலடியைத் தூண்டும் என்றும் அவர் வலியுறுத்தினார். இன்று(04) சனிக்கிழமை வெளியிட்ட ஒரு அறிக்கையில், அந்த செய்தித் தொடர்பாளர் தனது முந்தைய எச்சரிக்கையை மீண்டும் வலியுறுத்தி, ஈரானிய தூதரகங்கள் அல்லது தூதரக மையங்கள் மீது எந்தவொரு தாக்குதலும் பதிலடித் தாக்குதல்களுக்கு வழிவகுக்கும் என்று கூறினார்.

இந்தக் கருத்துக்களின்படி, அப்பகுதியில் உள்ள இஸ்ரேலிய ஆட்சியுடன் தொடர்புடைய அனைத்து தூதரகங்களும் ஈரானின் ஆயுதப் படைகளுக்கு முறையான இலக்குகளாகக் கருதப்படும்.

தனது எச்சரிக்கைகளின் மீது ஈரான் வேகத்துடனும் தீவிரத்துடனும் செயல்படும் என்றும், அச்சுறுத்தலின் தீவிரத்தையும் பதிலடி கொடுக்க இராணுவம் தயாராக இருப்பதையும் பேச்சாளர் மேலும் வலியுறுத்தினார்.