“Q-Day” என்பது Quantum Computer எனப்படும் அதிவேக கணினிகள் தற்போதுள்ள இணைய பாதுகாப்பு குறியீடுகளை (encryption) உடைக்கக்கூடிய நாளைக் குறிக்கும் ஒரு தொழில்நுட்ப சொல் ஆகும். இன்று வங்கிகள், மின்னஞ்சல்கள், சமூக ஊடகங்கள் மற்றும் அரசாங்க தகவல்கள் அனைத்தும் RSA மற்றும் ECC போன்ற குறியாக்க முறைகளால் பாதுகாக்கப்படுகின்றன. ஆனால் Google உள்ளிட்ட தொழில்நுட்ப நிறுவனங்கள், Quantum Computing வளர்ச்சி வேகமாக நடைபெறுவதால் Q-Day 2029 ஆம் ஆண்டுக்குள் வரக்கூடும் என்று எச்சரித்துள்ளன. 

சாதாரண கணினிகளை விட Quantum Computers பல மடங்கு வேகமாக சிக்கலான கணக்குகளை செய்ய முடியும். இதனால் தற்போது பாதுகாப்பானதாக கருதப்படும் குறியாக்க முறைகள் எதிர்காலத்தில் பாதுகாப்பற்றதாக மாறும் அபாயம் உள்ளது. இதன் காரணமாக வங்கி கணக்குகள், மருத்துவ பதிவுகள், இரகசிய அரச தகவல்கள் மற்றும் கிரிப்டோ நாணயத் தகவல்கள் கூட ஆபத்துக்குள்ளாகலாம் என்று நிபுணர்கள் எச்சரிக்கின்றனர்.

மேலும், “Harvest Now, Decrypt Later” என்ற புதிய அச்சுறுத்தலும் அதிகமாக பேசப்படுகிறது. இதன்படி, சில இணையத் தாக்குதலாளர்கள் இன்றே குறியாக்கப்பட்ட தகவல்களை சேகரித்து சேமித்து வைக்கின்றனர். எதிர்காலத்தில் சக்திவாய்ந்த Quantum Computer கிடைத்த பிறகு அந்த தகவல்களை திறந்து பார்க்க முடியும் என்ற நோக்கத்துடன் இந்த செயல் நடைபெறுகிறது. இதனால் தற்போதைய தகவல்கள்கூட எதிர்காலத்தில் கசிந்துவிடும் அபாயம் இருப்பதாக பாதுகாப்பு ஆய்வாளர்கள் கூறுகின்றனர். 

இந்த அபாயத்தை சமாளிக்க Google, IBM மற்றும் பல தொழில்நுட்ப நிறுவனங்கள் Post-Quantum Cryptography (PQC) எனப்படும் புதிய பாதுகாப்பு முறைகளை உருவாக்கி வருகின்றன. IBM நிறுவனம் 2029க்குள் பெரிய அளவிலான Quantum Computer உருவாக்க 10 பில்லியன் அமெரிக்க டொலர் முதலீடு செய்வதாக சமீபத்தில் அறிவித்துள்ளது. உலக நாடுகளும் நிறுவனங்களும் இணைய பாதுகாப்பை மேம்படுத்த அவசர நடவடிக்கைகளை மேற்கொண்டு வருகின்றன. எனவே Q-Day என்பது எதிர்கால தொழில்நுட்ப முன்னேற்றம் மட்டுமல்ல; உலகின் இணைய பாதுகாப்பை மாற்றக்கூடிய முக்கிய சவாலாகவும் பார்க்கப்படுகிறது.