வாஷிங்டனில் நடந்த பத்திரிகையாளர் சந்திப்பு விருந்தில் துப்பாக்கிச் சூடு நடத்தியதாக சந்தேகிக்கப்படும் நபர், 31 வயதான கலிபோர்னியரைச் சேர்ந்தவர் என அடையாளம் காணப்பட்டுள்ளார்.

சனிக்கிழமை இரவு வெள்ளை மாளிகை செய்தியாளர்கள் இரவு விருந்து நடைபெற்ற ஹோட்டலுக்குள் துப்பாக்கிச் சூடு நடத்தப்பட்டதைத் தொடர்ந்து கைது செய்யப்பட்ட நபரின் பெயரை கோல் தாமஸ் ஆலன் என சட்ட அமலாக்க அதிகாரிகள் தெரிவித்துள்ளனர்.

31 வயதான அந்த சந்தேக நபர், கலிபோர்னியாவின் லாஸ் ஏஞ்சல்ஸ் பகுதியில் உள்ள டொரன்ஸ் பகுதியைச் சேர்ந்தவர்.

வாஷிங்டன் ஹில்டன் ஹோட்டலுக்குள் பாதுகாப்பு அதிகாரிகளால் தடுத்து வைக்கப்பட்ட பிறகு, டிரம்ப் நிர்வாகத்தில் உள்ள அதிகாரிகளைச் சுட விரும்புவதாக அவர் சட்ட அமலாக்க அதிகாரிகளிடம் கூறியதாக, பிபிசியின் அமெரிக்க செய்திப் பங்காளியான சிபிஎஸ்ஸிடம் இரண்டு வட்டாரங்கள் தெரிவித்தன.

ஞாயிற்றுக்கிழமை என்பிசியின் 'மீட் தி பிரஸ்' நிகழ்ச்சிக்கு அளித்த பேட்டியில், அமெரிக்காவின் தற்காலிக தலைமை வழக்கறிஞர் டாட் பிளான்ச், சந்தேகப்படும் துப்பாக்கிச் சூட்டாளரின் நோக்கம் இன்னும் விசாரணையில் உள்ளது என்றும், ஆனால் "முதற்கட்ட" கண்டுபிடிப்புகள் அவர் நிர்வாக அதிகாரிகளை, குறிப்பாக அதிபர் டொனால்ட் டிரம்பை, குறிவைத்ததாகக் கூறுகின்றன என்றும் தெரிவித்தார்.

குற்றம் சாட்டப்பட்ட துப்பாக்கிதாரி ஹோட்டலிலேயே ஆயுதத்தை உருவாக்கியதாகக் கூறப்படும் அறிக்கைகளை புலனாய்வாளர்கள் இப்போது ஆராய்ந்து வருவதாகவும், அவர் "அதிக தூரம் செல்லவில்லை" என்றும் பிளான்ச் கூறினார்.

"அவர் பாதுகாப்பு வளையத்தை கஷ்டப்பட்டுத்தான் கடந்தார்," என்று கூறிய பிளான்ச், அந்த சந்தேக நபர் லாஸ் ஏஞ்சல்ஸிலிருந்து சிகாகோவிற்கும், பின்னர் வாஷிங்டன் டி.சி.க்கும் ரயிலில் பயணம் செய்திருக்கலாம் என்றும் குறிப்பிட்டார்.